İngiltərədə həvəskar xəzinə ovçusu Ben Bişop metal axtararkən tarixi əsər tapıb.

Metbuat.az “Posta.com.tr”yə istinadla bildirir ki, Bişop İngiltərənin Somerset qraflığında yerləşən zibilliklərin birində 1550-ci ilə aid olan qızıl üzük tapıb. Üzüyün üzərində cüt başlı qartal simvolu yer alıb. Bu da I Elizabetin rəmzi sayıldığından üzüyün təxminən 500 yaşı olduğunu deyə bilərik.

Ben Bişop kəşfi ilə bağlı maraqlı açıqlamalar verib. Onun sözlərinə görə, 7 ildir ki, xəzinə tapmaq üçün axtarışlar edir. Üzüyü ilk dəfə görəndə onun açma halqası olduğunu düşünüb. Daha sonra 10 min funt dəyərindəki üzüyün Elizabet taxtına aid olduğunu öyrənib.

B.Bişop “Üzük bir müddət muzeydə araşdırıldıqdan sonra mənə qaytarıldı. Satmaq istədiyimdə isə heç bir muzey almadı. Üzüyü satdıqdan sonra əldə edəcəyim pulu üzüyü tapdığım ərazinin sahibi ilə bölüşdürməyi düşünürəm”- deyə açıqlama verib.